!تمہارا وقت شروع ہوتا ہے ۔۔۔اب
نام: سیدہ کسریٰ نقوی
سیکشن: او۔ایچ ۔کے۔
کالج میں داخل ہوتے وقت آپ کے ذہن میں ہزاروں سوال ہوں گے۔ کیا یہ جگہ ویسی ہوگی جیسا میں نے سوچا تھا؟ کیا یہاں کے لوگ اچھے ہوں گے؟ میں دوست بنا سکوں گا؟ کیا میں اپنی پڑھائ میں کامیاب ہو پاؤں گا ؟ ان سب سوالوں کا ایک ہی جواب: یہ وقت تمہارا ہے، اور یہ سب کچھ تم پر منحصر ہے۔
یہاں تمہیں کچھ بھی پلیٹ میں رکھ کر نہیں دیا جائے گا۔ علم، دوستی، تجربہ،ہر چیز کے لیے خود آگے بڑھنا ہوگا۔ کلاس میں استاد کی کہی گئی ایک ایک بات مستقبل میں قیمتی ثابت ہو سکتی ہے اس لیے ابھی سے سنجیدہ ہو جاؤ۔ لیکن یاد رکھوکالج صرف پڑھائی کا نام نہیں یہ وہ جگہ ہے جہاں تم اپنی اصل شخصیت کو پہچان سکتے ہو۔
دوست بناؤ مقابلے میں حصہ لوسوالات کرو غلطیاں کرو اور ان سے سیکھو۔ کیونکہ جب تمہارا بھی آخری دن آئے گاتمہیں افسوس نہیں ہونا چاہیے کہ میں کچھ کر نہیں سکا۔
یہ وقت،یہ موقع، یہ زندگی… سب کچھ تمہارا ہے! اسے ضائع مت کرو بلکہ اس کا بہترین استعمال کرو۔
کالج میں قدم رکھتے ہی ہر طالب علم کے ذہن میں کئی خواب،کئی امیدیں اور کچھ خدشات ہوتے ہیں۔ وہ نئی دنیا جہاں نئے چہرے نئے مضامین،اور ایک مختلف تعلیمی ماحول ہوتا ہےہر کسی کے لیے ایک منفرد تجربہ ہوتا ہے۔ اگرچہ ابتدا میں سب کچھ نیا اور غیر مانوس لگتا ہےلیکن وقت کے ساتھ یہی راستے پہچان بن جاتے ہیں، یہی کلاس روم دوسرا گھر محسوس ہونے لگتے ہیں اور یہی لوگ جو اجنبی لگتے ہیں بہترین دوست بن جاتے ہیں۔
کالج کا وقت محض کتابی تعلیم حاصل کرنے کے لیے نہیں ہوتا بلکہ یہ زندگی کے حقیقی سبق سیکھنے کا بہترین موقع ہوتا ہے۔ یہی وہ وقت ہے جب انسان کو اپنی صلاحیتوں کا اندازہ ہوتا ہے اور اپنی کمزوریوں اور خوبیوں کا شعور ملتا ہے۔ سیکھنے کی اس دوڑ میں، کچھ لوگ محنت سے اپنے خوابوں کو حقیقت میں بدل لیتے ہیں جبکہ کچھ صرف وقت گزارنے میں لگے رہتے ہیں۔ فیصلہ آپ کے ہاتھ میں ہے—آپ نے اس وقت کو ایک عام طالب علم کی طرح گزارنا ہے یا ایک ایسے شخص کی طرح جو اپنے خوابوں کو حقیقت میں بدلنے کے لیے تیار ہے۔
کالج کی زندگی صرف آسانیوں کا نام نہیں،بلکہ یہاں کئی چیلنجز بھی سامنے آتے ہیں۔ کبھی کسی مضمون کو سمجھنے میں مشکل پیش آتی ہےکبھی وقت پر اسائنمنٹس مکمل کرنا ایک امتحان بن جاتا ہے اور کبھی خود اعتمادی کمزور ہونے لگتی ہے۔ لیکن یاد رکھویہ چیلنجز ہی تمہیں مضبوط بناتے ہیں۔ اگر تم ان چیلنجز کا سامنا حوصلے سے کرو گے تو یہی مشکلات تمہیں کامیابی کی طرف لے جائیں گی۔
ابھی تمہارے پاس وقت ہے، ابھی تمہارے سامنے ان گنت مواقع موجود ہیں۔ اگر آج تم نے اپنی زندگی کے اس قیمتی وقت کو ضائع کر دیا تو کل صرف پچھتاوا باقی رہے گا۔ یہی وقت ہے کہ محنت کرو، سیکھو، تجربات حاصل کرو اور اپنے خوابوں کی تعبیر کے لیے قدم بڑھاؤ۔ کامیاب وہی لوگ ہوتے ہیں جو وقت کی قدر کرتے ہیں اور جو اپنے وقت کو سنجیدگی سے لیتے ہیں۔ یہ وقت تمہارے مستقبل کی بنیاد رکھنے کا ہے۔ اگر آج تم محنت کرتے ہو تو کل تمہاری کہانی کسی کے لیے ایک مثال بن سکتی ہے۔ اگر آج تم اپنی صلاحیتوں کو پہچان کر ان پر کام کرتے ہو تو کل تمہاری شناخت ایک کامیاب شخصیت کے طور پر ہوگی۔ اب فیصلہ تمہارے ہاتھ میں ہے—کیا تم صرف دوسروں کی کامیابی کی کہانیاں سنو گے یا اپنی کامیابی کی کہانی لکھو گے؟ تو تمہارا وقت شروع ہوتا ہے۔۔۔ اب
